Ndalimi duhet të përdoret vetëm kur vërtetohet se është i nevojshëm, bazuar në vlerësimin individual dhe nëse nuk mund të zbatohen me efikasitet masat e tjera alternative më pak të ashpra. Në rastin e personave me nevoja të veçanta, për të konsideruar ndalimin duhet të merren parasysh edhe që të plotësohen nevojat e tyre të veçanta. Shëndeti i tyre, përfshi shëndetin mendor, do të jetë shqetësimi kryesor i autoriteteve kombëtare (Neni 11 (1) RCD i rishikuar).

Fëmija do të ketë mundësinë të komunikojë me të afërmit, këshilluesit ligjorë, personat që përfaqësojnë UNHCR-në dhe organizata dhe organe të tjera relevante kombëtare, ndërkombëtare dhe joqeveritare (Neni 18(2)(b) RCD i rishikuar).

Konsiderata kryesore duhet të jetë për interesat më të mira të fëmijës dhe do të rishikohen gjatë gjithë kohës së ndalimit.

Në rastet kur janë ndaluar fëmijë të pashoqëruar, duhet të sigurohet që të akomodohen veç nga të rriturit.

Sa të jetë e mundur, fëmijëve të pashoqëruar do t'u ofrohet akomodim në institucionet e pajisura me personel dhe ambiente që marrin parasysh nevojat e personave në moshën e tyre.

Fëmijët e pashoqëruar do të ndalohen vetëm në rrethana të jashtëzakonshme (Neni 11(3) RCD i rishikuar). Do të bëhen të gjitha përpjekjet për ta liruar sa më shpejt që të jetë e mundur të miturin e pashoqëruar të ndaluar. Fëmijët e pashoqëruar nuk do të ndalohen kurrë në mjedise burgu. 

Në vendin ku janë të ndaluar, fëmijët do të kenë mundësi të përfshihen në aktivitete të kohës së lirë, përfshi lojën dhe aktivitetet argëtuese, të përshtatshme për moshën e tyre.

Ndalimi i fëmijëve do të jetë vetëm hapi i fundit dhe pasi është përcaktuar që masat e tjera alternative më pak të ashpra nuk mund të zbatohen me efikasitet. Ky ndalim do të bëhet për periudhën më të shkurtër të kohës dhe do të bëhen të gjitha përpjekjet për ta liruar fëmijën e ndaluar dhe për ta vendosur atë në akomodim të përshtatshëm për fëmijët.

Viktimat e torturës, përdhunimit dhe dhunës së llojeve të tjera të rënda fizike, psikologjike ose seksuale kanë nevojë për vëmendje të veçantë dhe zakonisht nuk duhet të ndalohen. Ndalimi mund të përkeqësojë simptomat e traumës. Ndalimi duhet të zbatohet vetëm në rrethana të jashtëzakonshme.

Personat që vuajnë nga çrregullime mendore, përgjithësisht nuk duhet të ndalohen. Ndalimi mund të përkeqësojë simptomat e çrregullimeve mendore. Shtetet Anëtare do të sigurojnë monitorimin e rregullt dhe ndihmën e përshtatshme, duke marrë parasysh situatën e tyre të veçantë, përfshirë shëndetin e tyre mendor.