Менталните нарушувања може да влијаат врз квалитетот и количината на информации коишто барателот сака и/или може да ги даде. Изјавите може да се фрагментирани, неповрзани, да отстапуваат од временската оска, да се дадени импулсивно наместо свесно. Поради одредени ментални нарушувања, некои изјави може да се сосема надвор од реалноста. Потребно е да се земат предвид таквите фактори кога се проценува веродостојноста.

Потешкотии во давањето јасни и разбирливи изјави може да потекнуваат од медикаментозни проблеми на барателот и од зависности (на пр. земање јаки медикаменти, зависност од дроги или алкохол итн.).

Кога се работи за трговија со луѓе и особено за случаи кога лицето било подложено на насилство како мерка на контрола или како дел од експлоатација, вклучувајќи сексуално насилство, лицето може да има тешкотии да се сети на некои настани или на хронолошкиот редослед на настаните. Барателот може и да не сака да споделува детали за случаи на такво насилство поради чувство на срам и вина или да не сака да открие детали за трговците со луѓе поради страв од одмазда.

Во некои ситуации бременоста може да влијае врз она што барателот го изнесува во своите искажувања.  На пример, може околностите околу зачнувањето да се дел од барањето за меѓународна заштита или може изјавите на барателот да ја доведат во прашање веродостојноста, што може да се објасни со личните околности на барателката (културно и социјално потекло итн.). Во таквите случаи може да е потребно дополнително внимателно испрашување.  

За повеќе насоки околу проценката на веродостојноста и особено во поглед на можното влијание на посебните потреби, видете во „Практичниот водич од ЕАСО: Проценка на докази“.

Од пресудно значење е да се земе предвид факторот на возраста кога се проценува веродостојноста во случај на дете. Изјавите на детето може да бидат недоследни, нејасно искажани или да вклучуваат изрази што детето ги чуло од возрасни. Возраста е релевантен фактор, како во однос на времето кога се случиле настаните што ги доживеало, така и во однос на времето кога се дава изјавата (доказите).

Културата, верата и убедувањата на барателот може да го одредат начинот на кој барателот ги сфаќа социјалните улоги и односите на моќта,  како и начинот на кој ги разбира, толкува и ги претставува информациите. Другите фактори како образование, возраст, јазик, пол, социјален статус и обичаи се исто така важни во овој поглед. 

При разгледување на веродостојноста на доказите што служат како поткрепа на материјалните факти, овластеното службено лице треба да земе предвид дека индивидуалните околности и посебните потреби на барателот може да влијаат врз начинот на кој барателот ги претставува доказите. 

Барател од женски пол треба да бидат информиран за каква било посебна дополнителна помош што им е на располагање на жени, доколку постои.

Таквите групи може да имаат за цел помагање на жртви на трговија со луѓе или сродни проблеми, како жртви на родово-базирано насилство.